نصائح للسفر بالأطفال في الطائرة عشان تخلوا بالكم منها خاصة لو دي أول مرة تسافروا .
المرحلة الأولي نصائح قبل حجز تذاكر الطيران:
الطفل بيبتدي يسافر مع شركات الطيران من اليوم السابع وبعض الشركات من اليوم الــ 14 من الولاده , متفكرش تحجز تذكرة قبل المده دي ابدا.
الأطفال من سن 14 يوم لــ سنتين بيتم تصنيفهم كرضيع عند شركات الطيران , متحجرش كطفل.
سعر تذكرة الطيران للرضيع في الغالب بتكون 10% من القيمة + الضرائب.
الأطفال من سن الــ سنتين ويوم لحد ال 12 سنة يصنف طفل وبيكون سعر التذكرة قريب جدا من سعر البالغ
لو حضرتك معاك رضيع في الطيارة ممنوع منعاً باتاً انك تجلسي علي الممر او على مقاعد الطوارئ , ومحدش يختار المقاعد دي.
———————————————————————–
المرحلة الثانية في الإستعداد للسفر :
” معظم ” شركات الطيران حاليا بتعمل شنطه هاند باج زيادة للطفل في حدود 5-7 كيلو عشان تاخدي فيها اغراض البيبي علي الطياره ودي منفصلة عن الهاند باج للأب والأم – ممكن تتاكد من شركة الطيران.
حاول تاخد كل احتياجات الطفل اللي يحتاجها اثناء الرحله من اكل وحاجات زي كده .
خلي معاكم لعبه دايما بيحبها الطفل في ايده تاخدوها معاكم علي الطياره عشان ينشغل بيها فضلا عن جهاز ألعاب الكترونية ان امكن زي الايباد.
———————————————————————–
المرحلة الثالثة مرحلة المطار :
يفضل اننا نروح المطار دايما بدري بوقت كافي عشان ماتكونوش مضغوطين في الوقت تحسبا لأي مفاجآت مع الأطفال تحصل.
كمان حاجه مهمه انك تكونو بدري المطار لما يكون معاكم اطفال عشان تخلصو الاجراءات بدري بدري وبعدين تقعدوا تشربوا القهوة بتاعتكم وتدوا فرصة للأطفال تجري وتلعب وتتعب فتطلع الطيارة تنام .
الكار سيت للطفل او السترولر بيكون مجانا للطفل الأقل من سنتين ومش بيتحسب من الوزن اللي معاك , تقدر تستخدمه في المطار براحتك وبيتاخد منك على باب الطيارة للشحن.
———————————————————————–
المرحلة الرابعة مرحلة الطيارة :
ابعدو عن المقاعد الأخيرة في الطيارة عشان الضغط هيتعب الأطفال أكثر وكذلك مقاعد الطوارئ.
بكاء الأطفال أحيانا بيكون أمر طبيعي نتيجة ضغط الهواء متحسش بالتوتر والقلق.
لو احتجتم أي نوع من أنواع المساعدة محدش يتكسف انه يكلم طاقم الضيافة وتفسير المسألة , هما عارفين الحاجات دي وبيكون عندهم تجهيزات ليها.
لو اكل البيبي محتاج يتم تجهيزه فتكلموا طاقم الضيافة بياخدو منكم الأكل ويتم تجهيزه وتسخينه لدرجه الحرارة المناسبه.
ودي كانت اهم المعلومات عن السفر بالاطفال للخارج فى الطيارة