عمرك فكرت تسافر عبر الزمن و ترجع للماضي أيام ما كانت الدنيا بلونين أبيض و أسود؟
جربت تعيش في مكان من غير إنترنت إلا في أماكن محددة جدا؟! مكان مفيهوش غير أساسيات الحياة؟! مافيهوش KFC و McDonald’s و سلسلة المطاعم الأمريكية دي و الكوكاكولا؟!
من خلال المقال دا عن كوبا هننقلك تجربة شامله كل المعلومات اللى تتخيلها عن البلد
التأشيرة: من سفارة كوبا في مصر ( توجد سفارات أخرى في السعودية و لبنان وقطر)
بالنسبة للمصريين و عدد كبير جدا من الدول العربية و غيرها بتاخد بديل للتأشيرة يسمى كارت سائح.
http://misiones.minrex.gob.cu/en/egypt/consular-services#visa_turismo
المستندات المطلوبة لطلب تأشيرة كوبا :
1. شهادة مترجمة إلى الإسبانية ترجمة رسمية و موثقة من غرفة التجارة و وزارة العدل و وزارة الخارجية على الترتيب تشهد فيها بأنك مسافر لجمهورية كوبا بغرض السياحة فقط مش لأي سبب تاني.
2. كشف حساب بنكي برصيد (8242 دولار أمريكي) على الأقل.
3. شهادة من جهة العمل.
4. تأمين سفر يغطي فترة الإقامة في كوبا
5. حجز طيران مبدئى.
6. حجز فندق مبدئي يكون عليه إسمك زي جواز السفر.
7. الفورم.
8. صورتين خلفية بيضاء.
وفي طريقة تانية للحصول على كارت سائح من مطار كانكون في المكسيك و الطريقة دى نقلهالنا مسافر سعودي كان في هافانا، وحسب ما قال إنك بعد ما تحجز تذكرة من مطار كانكون إلى هافانا و عودة بتتوجه لي مكتب إستخراج كارت سائح إلى هافانا و بتاخدو على طول بعشرين دولار فقط.
تذاكر الطيران الي كوبا :
من إسطنبول لهافانا، التكلفة من 770 دولار إلى 1200 حسب مواعيد حجزك و البروموشن…
زمن الرحلة دايريكت 14 ساعة و نص ذهاب و 17 ساعة عودة لأن في ستوب في فنزويلا لمدة ساعة.
في حلول تانية اقل بس بتطلب إنك تاخد شنجن أو ترانزيت شنجن عشان تسافر على أي من الخطوط الأوروبية أو من ميامي في الولايات المتحدة.
و الأفضل دائما لما تسافر دول أمريكا الجنوبية تسافر كذا دولة مع بعض في القارة عشان تذاكر السفر مرتفعة من الشرق الأوسط عموما.
الإجراءات سريعة في المطار إلا مع بعض الجنسيات زي الأمريكية السودانية و النيجيرية و بعض الدول الأفريقية.
أفضل تكون مستعد و معاك صورة من كل الأوراق دي:
تذاكر الطيران
حجز السكن شامل العنوان
تأمين السفر
كارت الإقامة لو كنت مقيم في دولة غير بلدك
البزنس كارد
اسم جهة العمل
و لو جاي من بلد أفريقي لازم يكون معاك شهادة تطعيم، عشان هتتسأل عنه فى المطار ..
تقريبا بيتم مساءلتك عن كل دا لمدة ساعتين او اقل شويه و بالإضافة إلى تفتيش أمتعة دقيق و عن الكريديت كارد و إذا كان معاك مصاريف كفاية. بس دا كله هيحصل بأسلوب لطيف جدا و حتى الأغراض بيتم إعادتها للشنطة زي ما كانت.
السكن فى كوبا:
أسعار الفنادق و الهوستيلس مرتفعة جدا. و البديل ليها ال Casa Particulars و هي بيوت مصرح لها من الحكومة تأجر للأجانب و بكون عندها علامة مميزة و متوفرة جدا هناك ، تقريبا في كل شارع بتلاقي اثنين او تلاتة. الحجز بيتم على airbnb.com أو Homestay.com أو ممكن مباشرة من المالك بس السعر هيكون أعلى.
عادة الأوض لشخصين و ممكن تلاقي لأكتر و الأسعار بتبدا من 10 دولار. من أفضل الأماكن Casablanca و Old Havana .
و أقل الأسعار في فيدادو Vedado بس المسافة بعيدة شويه عن وسط البلد .
العملة فى كوبا :
العملة: البيسو Peso
العملة المحلية: CUP
من أغرب الأشياء في كوبا انه في عملتين عملة محلية للكوبيين تسمى إختصارا الكوب CUP Cuban pesos أو البيسو الكوبي، 1CUP=0.04$
يعني واحد بيسو محلي بيساوي 4 سنت. يمكن للسياح إستخدام ال CUP في حالات محددة زي ركوب البصات العامة داخل المدن بتكلفة أقل من 2 سنت، صدق أو لا تصدق، أو الإنتقال بالمركب من Casablanca لي Old Havana و العكس بتكلفة أقل من 1
سنت، أو ممكن إستخدامه في المطاعم المحلية بس ما بننصحش بالأكل من المطاعم المحلية.
عملة السياح: CUC
البيسو الكوبي القابل للتحويل Cuban Convertible Pesos إختصارا CUC و واحد CUC بيساوي واحد دولار. ودا بتستخدمه في كل معاملاتك و هتلاقي فرق كبير بينو و بين البيسو المحلي في القيمة. و نسبة لعلاقة كوبا السياسية السيئة مع أمريكا أفضل
إنك تاخد معاك يورو عشان قيمة البيسوس المحولة هتكون أكبر.
**البطاقات البنكية الصادرة من بنوك أمريكية و ماستر كارد لا تعمل في كوبا و عموما من الأفضل يكون معاك كاش.
المواصلات فى كوبا :
من المطار للسكن و العكس، ممكن ترتب الموضوع دا مع مالك السكن اللى هتنزل فيه و دي خدمة معظمهم بيقدموها مقابل ٣٠ دولار او اقل ون واي.
بس في طريقة تانية بسعر اقل من كدا، هي انك تطلع برا المطار و تاخد عربية رايحة لهافانا لكن لازم تتفق معا على السعر قبل ما تركب و ممكن يكون السعر منخفض جدا، أقل من واحد دولار حسب ما سمعنا من ناس سافرت هناك برضو.بس دى مش معلومه اكيدة
وسائل النقل فى كوبا:
عبارة، باص، تاكسي، توك توك، عجلة، حنطور.
داخل هافانا: عموما مش هتحتاج لمواصلات كتير لانو معظم الوقت ممكن تتمشى في هافانا القديمة وهي المنطقة اللى بيفضلوها السياح.
كيفية التنقل من مدينة لمدينة داخل كوبا:
محطة الباص: Viazul
مواعيد تحرك الباص 9:00 صباحا. الحجز أونلاين قبل أسبوع من مواعيد الرحلة بس احيانا في ناس بتكنسل و هتلاقي كراسي في الباص و تكلفة الباص ١٢ دولار. لو ما لقتش باص، ممكن تلاقي حاجة اسمها تاكسي جماعي Taxi Collectivo و دا يا اما هتلاقي سواقين بيدوروا على ركاب أو سياح رايحين نفس الوجهة بتاعتك و بيدورو على حد يشاركهم تمن التاكسي، و بيكون سعره مابين 15 لــ 25 دولار للراكب الواحد حسب تفاوضك مع السواق و خلي بالك إنه سعر مدينة ترينيداد أكتر من كدا.
بس عموما من الأفضل إنك تسافر لكوبا في مجموعة عشان تتشاركو تكلفة المواصلات و السكن و دا بيعمل فرق كبير في التكلفة. دور على ناس مسافرة هناك في نفس الوقت بتاعك من على موقع couchsurfing.org
الإنترنت في كوبا:
في واي فاي بس في كوبا و موجود في أماكن محددة زي بعض الحدائق العامة و hotels . و عشان تخش على النت لازم تشتري كارت إنترنت بخمسة بيسو سياحي كافي لمدة خمسة ساعات غير محدودة البيانات. لازم يكون جوازك معاك عشان تشتري الكارت و بتلاقي متوفر في الاوتيلات. هتلاقي اليوزرنيم و الباسويرد في الكرت، اكتبهم عندك في التليفون عشان كل مرة تتصل بالنت لازم تدخلهم فالأفضل إنك تعمل لهم كوبي بيست و خلاص.
الكهرباء فى كوبا:
في الأوضة الوحدة بتلاقي فيشة 120 و فيشة 220، الحل انو يكون معاك ادابتر يونيفيرسال.
التسوق فى كوبا :
هناك ممكن ما تقابلتش مركز تسوق خالص و السوبر ماركتس نادرة جدا و ممكن تمشي كمان كيلومترات عشان تلاقي واحد و بعد كدا فيها الأساسيات بس و هتلاقي الناس بتقف صف عشان تشتري و هم بيحترمو حكاية الصف دي قوي في كل حتة ما عدا ركوب البصات كلو بخش معركة. فا لازم تجيب معاك متعلقاتك الشخصية و بالذات الستات جيبي احتياجاتك الشخصية بالكمية اللي تكفيكي طول أجازتك في كوبا.
افضل وقت لزيارة البلد :
يستحسن زيارة كوبا في الفترة من بعد شهر أكتوبر إلى شهر أبريل لتجنب موسم الأعاصير و الأمطار. و بتتراوح درجة الحرارة في كوبا بين 21-27 درجة مئوية. و الرطوبة في شهر مارس متوسطة و محتملة.
-هافانا:
تتميز المباني في كوبا عامة و بالأخص في هافانا القديمة بعمارة الحقبة الإستعمارية Colonial Era Architecture و هتحس كأنك دخلت في فيلم من أفلام الأبيض و الأسود في الستينات و الخمسينيات و بالذات مع العربات الأمريكية الكلاسيكية المنتشرة في البلد
بألوانها المختلفة و اللى انتشرت بسبب العقوبات الأمريكية المفروضة من خمسين سنة و منع الحزب الشيوعي الحاكم شراء العربيات في ستينات القرن الماضي. و بجد الناس دي عملت معجزة عشان تحافظ على عربات قديمة جدا زي كدا و بعضها عمرو 100 سنة
و لسة بيشتغل بكفائة عالية جدا لدرجة انك ممكن تسافر بيها لمدة ساعتين من غير ما تتعطل خالص