كيفية أنشاء كشف حساب بنكي مظبوط تتقبل بيه في اي سفارة بسهوله

ازاي تخلي كشف حسابك قوي جدا وسبب قبولك في اي سفاره على وجه الأرض
—————————————————————————————————————————————-
هنتكلم النهاردة في موضوع مهم جدا في السفر وهو ازاي تظبط كشف الحساب بتاعك عشان تاخد اي فيزا في الدنيا

في اعتقاد خاطئ عند الناس ان طالما معايا مبلغ في حسابي في البنك اني كدة هسافر .. السفارات خصوصا السفارات الكبيرة مبتبصش للموضوع من ناحيه انت معاك فلوس ولا لأ .. لكن بتبص اكثر لايه هو نمط الحياة اللي انت عايشها في بلدك وطريقة حياتك وهل هتحتاج تكسر الفيزا بتاعتهم وتفضل قاعد عندهم ولا لأ.

والنصايح دي ليك عشان تخلي كشف حسابك قوي جدا وتقدر تاخد فيزا الشنغن أو اى بلد بسهوله

1- مبلغ ايداع ثابت ( اللي هو مرتبك ) يتحول على حسابك في يوم ثابت كل شهر

ولو بتقبض كاش أو انت فريلانسر مثلا .. ساعتها تجمع الفلوس الكاش دي وتروح تحطها بأيدك في البنك في يوم ثابت كل شهر وتكتب في الاتش ار ليتر انك بتقبض كاش

2- بلاش تسحب مرتبك مرة واحدة فقط في الشهر لأنك كده بتخلي حسابك راكد ومفيهوش حركه باقي أيام الشهر .. يعني مثلا مرتبك 3000 جنيه .. متروحش يوم 1 مثلا تروح تسحب الــ 3000 كلهم! ما انت كدة هتخلي حسابك راكد باقي ايام الشهر لغاية الشهر اللي بعديه

سحب الفلوس يكون علي دفعات اسبوعيا .. و هتخلي تعاملاتك في السحب والصرف بالفيزا كارد .. يعني مثلا هتسحب بالفيزا يوم 1 في الشهر 900 جنيه من مرتبك .. يوم 8 مثلا تسحبلك 900 كمان .. يوم 16 تسحبلك 900 كمان وهكذا ..

تشتري مشترياتك ( سواء اونلاين او من المحلات ) بالفيزا .. تدفع فواتيرك على النت بالفيزا .. تشحن رصيدك بالفيزا .. وهكذا .. من الاخر تحسسهم انك عايش حياة طبيعية ومستقرة في مصر .. بتقبض فلوس .. وتصرف منها اسبوعيا حسب احتياجك وتشتري

حاجتك وتدفع فواتيرك وتصرف من مرتبك .. طيب هيعرفوا ازاي انك بتعمل كل دة وحياتك مستقرة مش عليك ديون مثلا و بتسدد فيها وعايز التأشيرة عشان تهرب ؟ ببساطة الاثباتات هتكون لما تتعامل بالفيزا كارد .. كل التعاملات دي هتبان في كشف حسابك ..

التعامل الكاش مش هيثبت حياتك دى ! عشان كدة لازم تحول كل حياتك للفيزا على الاقل لغاية لما تاخد التاشيرة وبعدين يا سيدي اعمل ما بدالك

3- هتخلي جزء من مرتبك يفضل في حسابك كل شهر ( كأنك بتحوش ) عشان تتراكم الفلوس في حسابك ويتكون رصيد إجمالي مناسب بعد فتره

طيب افرض مرتبك ضعيف ومش هتعرف تحوش منه .. و حد هيسلفك مبلغ كبير تحطه في حسابك .. ساعتها لازم لازم لازم تحط المبلغ دة قبل فتره كبيرة من تقديمك ع الفيزا متحطهاش قبل ما تقدم على الفيزا بمدة قصيرة .. بمعنى مثلا لو هتقدم على الفيزا في شهر

7 مثلا .. تقوم انت من شهر 1 تاخد الفلوس الكبيرة دي تحطها في حسابك وترميهم .. ولما تتراكم الإيداعات والسحوبات الشهريه على حسابك لمدة 6 شهور هيصبح المبلغ الكبير اللي اتحط في الاول ده مبيشكلش اي مشكله او مصدر شك فيك وتبقي حققت المعادلة

الصعبة ( مبلغ اجمالي كبير في حسابك وكمان بقي عليه تعاملات كثيييير جدا وحساب منطقي غير قابل للشك )

4- متعملش سحب وايداع عمال علي بطال .. يعني بلاش كل يوم تروح تحط فلوس و هوووب تاني يوم تروح تسحبهم تانى وتفضل تعمل كدة طول ايام الشهر وفاكر ان دة اللي بيحرك الحساب بتاعك .. للاسف هتاخد رفض لانها بتبقي مفقوسه اوي

انك بتعمل كدة عشان تعمل حركه وهميه على الحساب بتاعك .. بالعقل وبالمنطق القنصل هيقول انت بتحط الفلوس ليه في البنك لما انت عارف ومتأكد انك هتسحبهم بعد كام يوم .. ما كنت تخليهم معاك في جيبك وتصرفهم بالمره اسهل واسرع .. احترم ذكاء اللي

قدامك عشان اللي قدامك يحترم ذكائك

4- بلاش تعمل إيداعات اكثر من اللازم .. الايداعات دي هتتقارن مع مهنتك و وظيفتك .. يعني مثلا متكونش موظف حكومه وبتحط في حسابك كل اسبوع كام الف جنيه .. هتقول وهما مالهم دي فلوسي وانا حر فيها .. لا للاسف انت مش حر انت لازم تثبت مصدر

ايداعاتك دي مقارنه مع وظيفتك .. هل انت بقي هتقدر تجيب لهم كل قرش دخل في حسابك دخل منين ؟؟ اكيد لا يعني .. يبقي مندخلش نفسنا في متاهات .. الايداع المنطقي بيكون اتنين فقط : ايداع اساسي بتاع مرتبك في يوم ثابت في الشهر .. و ايداع اضافي كل

شهر لمدة مرة واحدة فقط او مرتين بالكثير في ايام متفرقه من الشهر كأنه عمولات او اوفر تايم او شغل بعد الظهر .. كدة مبلوعه ..

الا في حاله واحدة فقط الايداعات الكثيرة المستمرة تبقي مفيدة ليك .. لو كان ليها مصدر معروف ومش انت اللي بتودعها تكون بتتحول لك من مؤسسات وجهات ثانيه .. زي مثلا واحد مبرمج بيتحوله مبالغ مستمرة من جوجل وابل ومصادر معلومة وهتبان في كشف

الحساب .. ساعتها بس تبقى مصدر قوة .. لكن اي حاجه تانيه يبقى لأ

5- لو هنفترض انك هتصرف كل يوم في الشنجن 100 يورو مثلا .. وهتقعد هناك اسبوع .. يعني متوقع انك تصرف 700 يورو .. متروحش بقي تقدم لهم بكشف حساب فيه 700 يورو فقط !! لأن مفيش بني ادم عاقل في الدنيا هيروح يصرف كل اللي حيلته

ورصيده في البنك يبقي صفر بعد ما يرجع عشان يتفسح في بلد واحدة فقط !!! مفيش حد بيعمل كدة .. دة كدة دليل انك هتموت علي الفيزا وعايز تعمل اي حاجه عشان تاخدها حتي لو هتشحت بعدها و حسابك البنكي هيبقي صفر بعد ما ترجع

طيب تعمل ايه عشان يبقي الحركه دي منطقية ؟؟ لو مثلا متوقع انك تصرف 700 يورو ف اسبوع .. يبقي ساعتها قدم لهم كشف حساب فيه 1400 يورو يعني الضعف .. بحيث لما السفارة تعمل حسبتها تلاقي انك بعد ما ترجع من عندهم هيتبقي في رصيدك فلوس

كثير وبكده هتبقي منطقي انك راجل رايح يتفسح في الشنجن ومش هامك ان فلوسك تنقص من الرحله دي

6- لو انت صاحب شركه هتقدم كشف حساب الشركه اللي بتبين حجم تعاملاتها على مدار الكام سنه اللي الشركه اشتغلت فيهم ويكون متناسق مع السجل التجاري .. يعني ميكونش السجل التجاري لسه معمول من كام شهر وكشف حساب الشركه يكون فيه نص مليون مثلا